Membe kusindikiza mwili wa Balozi

Writen by sadataley 1:35 PM - 0 Comments

Makamu wa Rais, Dk Gharib Bilal akimpa mkono wa pole ndugu wa Balozi wa Malawi nchini, hayati Flossy- Gomile Chidyaonga, Godfrey-Gomile Chidyaonga jijini Dar es Salaam jana wakati wa ibada ya kumuombea marehemu kabla ya kusafirishwa kwenda kwao kwa mazishi. Picha na Rafael Lubava 

Na  Joseph Zablon, Mwananchi

Dar es Salaam. Rais Jakaya Kikwete, Makamu wa Rais Dk Gharib Bilal wamejumuika na mabalozi mbalimbali nchini wamejumuika kuuaga mwili wa aliyekuwa Balozi wa Malawi nchini Flossy Gomile-Chiyaonga.

Mbali ya Viongozi hao pia watu mbalimbali walijitokeza kuuaga mwili wa Balozi huyo jana kwenye ukumbi wa Mwalimu Julius Nyerere walipotoa heshima zao za mwisho.

Mwili wa balozi huyo unatarajiwa kuzikwa mjini Blantyre nchini Malawi kesho na marehemu alifariki dunia Ijumaa iliyopita baada ya kupoteza fahamu ghafla akiwa nyumbani kwake na alipokimbizwa hospitalini ilibainika kuwa aliishapoteza maisha.

Waziri wa Mambo ya Nje na Ushirikiano wa Ushirikiano wa Kimataifa, Bernad Membe ambaye ataiwakilisha Tanzania katika msiba huo, alisema kuwa serikali itatoa ndege itakayosafirishwa mwili huo hadi mjini Blantyre.

Alisema balozi huyo ambaye aliripoti nchini miaka miwili iliyopita, alikuwa kiungo muhimu baina ya Tanzania na Malawi na alikuwa mtu ambaye anapenda kujielimisha na kujumuika na wengine wakati mwingi bila kujali hadhi yake.

Alibainisha kuwa balozi Gomile Chidyaonga alitumia muda wake mwingi kutafuta elimu na kutokana na hali hiyo mara kwa mara amekua akishiriki midahalo ya kitaaluma iliyokuwa inafanyika Chuo Kikuu cha Dar es Salaam (UDSM) na alikuwa kiungo muhimu wakati wa mgogoro wa mpaka baina ya nchi mbili.

“Tumepoteza kiungo muhimu baina ya mataifa haya mawili na amefariki wakati akiwa katika harakati za kuelekea nchini humo kwa likizo ya kawaida na ilikuwa aondoke Alhamisi lakini kwa kuwa alikuwa hajisikii vizuri alisema ataifanya safari yake Ijumaa,” alisema Membe.

Awali akizungumza katika hafla hiyo, Balozi mdogo wa Malawi nchini, Kwacha Chisiza alisema kuwa nchi hiyo imepata pengo kubwa kutokana na kumpoteza balozi huyo msomi ambaye pia aliwahi kuwa mkuu wa vitivo viwili tofauti katika Chuo Kikuu cha Malawi.

Chisiza alisema kuwa balozi huyo pia aliwahi kushika wadhifa kama huo katika nchi za Rwanda, Shelisheli, Uganda, Burundi na balozi mdogo nchini Uingereza na taarifa za kitabibu zilieleza kuwa balozi huyo alifariki kutokana na kupasuka mshipa mkubwa wa moyo hivyo kutiririsha damu mwilini na kusababisha kifo chake

• Facebook
• Tweeter
• Google+
• Pinterest