Writen by sadataley 7:12 AM - 0 Comments

Wasiojua kusoma, kuandika kupunguzwa

 

Na Halbel Chidawali, Mwananchi

Serikali imefufua na kuboresha mpango wa awali wa Elimu ya Watu Wazima kupitia program ya ‘Ndiyo Ninaweza’ yenye lengo la kupunguza idadi ya watu wasiojua kusoma na kuandika.

  Vile vile imesema,itatumia uzoefu uliopatikana katika utekelezaji wa mpango wa uwiano kati ya elimu ya watu wazima na jamii(Mukeja)ambao mpaka mwaka 2012 ulikuwa na jumla ya wanakisomo 907,771.

  Kauli hiyo ya Serikali imefuatia swali la Diana Kilolo, Mbunge wa Viti Maalumu CCM,aliyetaka kujua Serikali ina mpango gani wa kuimarisha elimu ya watu wazima nchini.

  Akijibu swali hilo, Waziri wa Elimu na Mafunzo ya Ufundi, Dk Shukuru Kawambwa alisema,utoaji wa elimu ya watu wazima ni jukumu mojawapo kati ya majukumu ya wizara hiyo na kuwa kulingana na Sera ya Elimu na Mafunzo ya mwaka 1995, kila asasi ya elimu yaani shule za msingi na sekondari zilizopo nchini ni vituo vya elimu ya watu wazima.

Alisema uamuzi huo wa kisera ulifikiwa ili kuwezesha utoaji wa elimu hiyo kutumia miundombinu ya asasi hizo ambazo ni pamoja na madarasa, vifaa vya kufundishia na kujifunza, walimu na nyenzo nyinginezo.

  Alisema licha ya kuwa sensaya mwaka 2012 bado haijatoa mchanganuo wa takwimu za watu wasiojua kusoma,kuandika na kuhesabu, bado idadi ya watu wasiojua kusoma na kuandika nchini haijamalizika.

  Aliongeza kuwa takwimu za sensa ya mwaka 2002 zilionyesha kuwa kati ya watu wazima na vijana kuanzia umri wa miaka 15 na kuendelea milioni 6.2 sawa na asilimia 31 walikuwa hawajui kusoma,kuandika na kuhesabu.

  Alisema juhudi za pamoja zinahitajika ili kuwaondolea wananchi kadhia ya kutojua kusoma na kuandika na kuwataka viongozi wa kada na ngazi zote zikiwamo, mikoa,wilaya, kata na viongozi wa dini na wale wa asasi zisizo za Serikali kujihusisha kikamilifu katika kuhamasisha na kuleta msukumo mpya katika kutekeleza mpango wa elimu ya watu wazima nchini.

Hivi karibuni kumetokea tatizo la wahitimu wengi wa shule za msingi na sekondari kumaliza elimu huku wengi wao wakiwa hawajui kusoma ,kuandika na kuhesabu jambo lililozua mjadala mkubwa Bungeni na kusababisha mvutano mkali kutokana na matokeo mabaya.

• Facebook
• Tweeter
• Google+
• Pinterest