Writen by sadataley 1:46 AM - 0 Comments

Warioba atoa mwongozo kwa mabaraza ya kutoa maoni ya Katiba

Na Mwandishi Wetu, Mwananchi  (email the author) 

Dar es Salaam. Mwenyekiti wa Tume ya Mabadiliko ya Katiba, Jaji Mstaafu Joseph Warioba amesema Tume imeamua kuwa    na makundi mawili yatakayopewa nafasi ya kuandaa mikutano ya kujadili rasimu ya Katiba Mpya.

Taarifa iliyotolewa jana na Mwenyekiti huyo ilisema kuwa sheria  ya mabadiliko ya Katiba kifungu cha 18(3) kinasema Tume ina wajibu wa kuunda mabaraza ya Katiba kwa ajili ya kupitia na kutoa maoni juu ya rasimu iliyoandaliwa na Tume.

Alisema  kwa mujibu wa  kifungu cha 17(6)  kinaeleza kuwa kama mazingira yatahitaji vinginevyo Tume itabuni utaratibu unaofanana ambao utatumika kila upande wa Muungano.

“Kutokana na sheria ya mabadiliko ya Katiba inavyosema Mabaraza ambayo Tume itayasimamia  na kukusanya maoni ni Mabaraza ya Katiba ya Wilaya ngazi za Mamlaka ya Serikali za Mitaa.

Alisema mabaraza ambayo Tume haitayasimamia ni mabaraza ya katiba ya asasi , taasisi na makundi ya watu wenye malengo yanayofanana.

Warioba alifafanua kuwa miongoni mwa asasi, taasisi na makundi ya watu wenye malengo yanayofanana ni kama vile jumuiya za kidini, chama cha siasa, asasi za kiraia,  taasisi ya elimu ya juu, chama cha wafanyakazi, chama cha wakulima, chama cha wafugaji, chama cha wanahabari, baraza la watoto.

Nyingine ni taasisi ya wafanyabiashara, baraza la wanawake,taasisi ya wanataaluma, baraza la vijana, baraza la wazee, kundi au makundi ya watu wenye malengo yanayofanana na kundi au makundi ya watu wenye mahitaji maalumu.

“Asasi na makundi ya watu wenye malengo yanayofanana ambayo yana mfumo wa kiuendeshaji kuanzia ngazi ya chini hadi taifa, yataandaa utaratibu wa kuyakusanya maoni kuhusu rasimu ya Katiba kutokana na wanachama wao na kuyawasilisha Tume ya Mabadiliko ya Katiba”alisema Warioba.

Alisema makundi ambayo yatakuwa hayana mfumo wa kiuendeshaji  kuanzia ngazi ya chini , yataendesha mabaraza ya Katiba kwenye ngazi ya taifa  na kuwasilisha maoni kwenye Tume hiyo.

• Facebook
• Tweeter
• Google+
• Pinterest