Writen by
sadataley
7:14 PM
-
0
Comments
TAMKO LA TYVA
(TANZANIA YOUTH VISION ASSOCIATION)
KWA VYOMBO VYA HABARI KUHUSU
RASIMU YA KATIBA
Taarifa kwa Vyombo vya Habari juu ya Uzinduzi wa Rasimu ya Katiba ya Jamuhuri ya Muungano wa Tanzania na hatua zitakazochukuliwa na TYVA kuichambua rasimu hiyo.Jana tarehe 3 Juni 2013 kwa niaba ya TYVA nilihudhuria shehere za uzinduzi wa Rasimu ya Katiba Mpya ya Jamuhuri ya Muungano wa Tanzania. Niliambana na Mkuu wa Idara ya Ushawishi na Utetezi ya TYVA ndg. Alfred Kiwuyo tulifika katika viwanja vya Karimjee kushuhudia tukio hilo ambalo lilizinduliwa na Makamu wa Rais wa Jamuhuri ya Muungano, Dr. Gharib Bilal. Aidha ikumbukwe kuwa tarehe 9 Januari mwaka huu hapo hapo Karimjee, TYVA tuliwasilisha mbele ya Tume ya Mabadiliko ya Katiba rasimu ya maoni ya vijana juu ya
nini sisi vijana tunadhani yawemo ndani ya Katiba Mpya ya Tanzania.
Tumebahatika kupata nakala ya Rasimu ya Katiba Mpya ya Jamuhuri ya Muungano wa Tanzania pamoja na kuwa Tume kwa sababu inazozijua yenyewe haikutoa nakala za Katiba hizo kwa wawakilishi wa asasi za Kiraia mara baada ya zoezi la uzinduzi kukamilika hiyo jana.
Ndani ya rasimu hii ya Katiba Mpya yapo masuala mengi ya kuyatafakari na kuyafanyia uchambuzi wa kina, na kutoa maoni ya kuiboresha ili hatimaye rasimu hii kabla ya kuwa sheria mama iwe yenye sura ya kitaifa na inayozingatia hali ya sasa ya Watanzania na kuweka misingi itakayoihuisha Tanzania kwa vizazi vijavyo.
Ni mapema mno kuanza kuikosoa kabla ya kuipitia yote na kuichambua lakini ni muhimu sana kuanza kuichambua, kubaini mapungufu, kupendekeza maboresho, ilkiwa ni pamoja na kushawishi uongezwaji wa mambo ya msingi ambayo hatutayaona. Hili litafanyika ili kuiboresha sambamba na muda uliotolewa na Tume hiyo.
Ni vema basi tuumumie muda huu vizuri kuhakikisha kuwa kila neno ndani ya rasimu hii lina mlengo wa sura ya maslahi ya Kitaifa. Moja kati ya mambo yenye sura ya utaifa ni uwakilishi wa Wananchi katika maamuzi yahusuyo maisha yao na ustawi wao kupita bunge la Muungano ambalo limeainishwa ndani ya Rasimu na mabunge ya washirika wa Muungano ambayo Rasimu hii haijayazungumzia. Hili la uwakilishi tutalizungumzia
katika Makala zetu kwa upana kidogo. Hapa nitoe msimamo wa TYVA baada ya tukio la jana la uzinduzi wa rasimu hii.
Kwa ufupi kuhusu vijana, Rasimu ya Katiba Mpya imeweka ibara moja maalumu inayozungumzia haki na wajibu wa Vijana (Ibara ya 43). Nitanukuu ibara hii inavyosema “Kila Kijana ana haki na wajibu wa kushiriki kikamilifu katika shughuli za maendeleo ya Jamuhuri ya Muungano pamoja na jamii kwa ujumla, na kwa mantiki hiyo, Serikali ya Jamuhuri ya Muungano, serikali za Washirika wa Muungano na jamii zitahakikisha kuwa vijana wanawekewa mazingira mazuri ya kuwa raia wema, na kupatiwa fursa za kushiriki kikamilifu kaitika Nyanja za kisiasa, Kiuchumi, kijamii na kiutamaduni” mwisho wa nukuu.
TYVA kwa kuwashirikisha vijana, tutaifanyia uchambuzi rasimu hii ya Katiba Mpya kwa mapana na marefu, lakini kwa sasa vijana tutafakari mambo kadha wa kadha ikiwa ni pamoja na maswali kwa mfano; je uwepo wa ibara moja pekee ndani ya rasimu hii unajitosheleza kuelezea haki na wajibu wa vijana nchini? Ye kama ibara ya 43 inavyosema juu ya vijana, je ni ibara muafaka? Hapa tunaweza kuangalia haki nyingine kama elimu (ibara ya 41), haki ya kupata huduma za afya (ambayo haijazugumziwa ndani ya rasimu hii isipokuwa haki ya kuwa hai katika ibara ya 23), haki ajira na kuona kama zinagusa vijana kwa kuzingatia hali ya sasa ya ongezeko la idadi ya vijana hasa ukizingatia kuwa ifikapo mwaka 2050 idadi ya Watanzania inakadiriwa kuwa na watu Milioni 138 ( kwa mujibu wa 2012 Word Population Data Sheet), hapana shaka vijana watakuwa zaidi ya asilimia 40 kwa kuwa kwa idadi ya watu waishio sasa takribani 44.9 milioni (Kwa mujibu wa National Bureau of Statistics, 2012) kati yao watoto chini ya miaka 15 ni zaidi ya asilimia 45. Hii inaweka wazi makadirio kuwa ifikapo mwaka 2050
karibuni nusu ya idadi ya watu wote wa Tanzania watakuwa ni vijana chini ya miaka 35 na zaidi kwa kuwa pia kiwango cha siku za kuishi ni inakadiriwa kuwa miaka 57. Kwa takwimu hizi, vijana wa leo hatuwezi kuepuka kuweka misingi imara ya Taifa letu na fursa hiyo tunayo sasa kupitia ushiriki wetu katika kuunda Katiba Mpya.
TYVA ilikuwa katika mashauriano na asasi nyingine kama Restless Development, Tamasha, TYC na nyinginezo ambazo kwa pamoja zilifikira kuunda Baraza la Vijana la Uchambuzi wa Rasimu ya Katiba Mpya. Huu ndio wakati muafaka wa kwenda mbele zaidi na kuichambua kwa mtazamo wa umoja wa vijana. Sisi tukiwa kama asasi za kiraia za vijana tunajukumu hili mbele yetu.
TYVA kwa mashauriano na asasi nyingine za vijana inatarajia kuaandaa Baraza la Vijana la Uchambuzi wa Rasimu ya Katiba Mpya ya Jamuhuri ya Muungano wa Tanzania. Tunatarajia kufanya mkutano wa Baraza hilo Mwezi Julai 2013 katikati. (Mid-July). Hatupaswi kusubiria mkutano wa baraza ndio tuanze uchambuzi, hapana uchambuzi wetu vijana unapaswa kuanza sasa, kisha tukikutana katika baraza ndipo tutaleta hoja zetu. Napenda kutumia fursa hii kuwahamisha vijana, kuanza kuichambua rasimu hii katika maeneo yote yaliyoainishwa ndani yake, kupanga hoja kimaandishi tayari kwa kuwasilisha katika baraza la Vijana la Katiba tutakalounda pia kutengeneza rasimu ya
Pili ya maoni yetu na sisi TYVA tutayawasilisha mbele ya Tume ndani ya muda walioutoa kama ambayo tuliwasilisha maoni ya vijana wakati wa zoezi la ukusanyaji wa maoni ya Katiba Mpya. Sambamba na hili, kwa kuwa hapa nchini hatuna Baraza Huru la Vijana ambalo lingeweza kuwa chombo mahusus kuwasemea vijana hasa katika maoni yao juu ya rasimu hii ya Katiba mpya, basi nitumie fursa hii kutoa mwito kwa vijana wote nchini, wanafunzi, wafanyakazi na vijana wasio wafanyakazi, wakulima, wafanyabiashara na vijana wa kada zote, kuungana pamoja. Kuungana kwetu pamoja kunaweza kuwa katika makundi yanayotambulika kisheria mfano asasi za kiraia za vijana katika mikoa mbalimbali hapa nchini. Tumieni muda huu, kupata nakala za Rasimu ya Katiba Mpya, kujielimisha nayo, na kisha kuunda mabaraza na kuichambua. Pamoja na kuwa Tume ya
Mabadiliko ya Katiba imejipanga kutoa elimu kwa wananchi juu ya rasimu hii, pia TYVA iko mbioni kutengeneza chapisho rahisi la Rasimu hii ambayo hapana shaka tutaisambaza mikoa kadhaa kama sio yote hapa nchini ili kuwasaidia vijana kuilewa, kuichambua rasimu hii na kuitolea maoni ya maboresho. Wakati ni sasa, wakati ni huu, amka kijana, chukua hatua, fursa ya kuunda Taifa letu kwa upya ndio huu, usibaki nyuma, Katiba Mpya ni yetu sisi na ya vizazi baada yetu.
Imetolewa na;
Ndg. Frederick Eddie Fussi
Katibu Mtendaji
Tanzania Youth Vision Association [TYVA]
4 Juni 2013
www.tyvavijana.or.tz
tyvavijana@yahoo.com
Sinza Afrika Sana,
P.O.Box 110024,
No comments
Post a Comment