Writen by sadataley 8:58 AM - 0 Comments

      Rais Kikwete simamia Katiba Mpya

      Rais Jakaya Kikwete akizungumza na viongozi wa Chadema kuhusu mchakato wa Katiba Mpya Ikulu jijini Dar es Salaam 

Jumatatu iliyopita Tume ya Mabadiliko ya Katiba ilizindua rasimu ya Katiba Mpya ya Jamhuri ya Muungano wa Tanzania.

Rasimu hiyo ambayo imezua mijadala ya aina mbalimbali imependekeza mambo mazito katika mustakabali wa nchi ikiwamo kuwa na serikali tatu, yaani Serikali ya Muungano, Serikali ya Zanzibar na Serikali ya Tanzania Bara.

Vilevile, rasimu hiyo ya Katiba imependekeza kuruhusiwa kwa wagombea binafsi kwa nafasi mbalimbali za uongozi, kufutwa kwa viti maalumu vya ubunge, matokeo ya urais kuhojiwa mahakamani, kuundwa kwa tume huru ya uchaguzi, madaraka ya rais kupunguzwa na mshindi wa uchaguzi wa rais apatikane kwa kupata kura zaidi ya asilimia 50.

Kwa jumla mapendekezo haya yamepokewa kwa hisia tofauti na watu mbalimbali nchini vikiwamo vyama vya siasa, wachumi, wasomi na watu wa kawaida.

Vipo vyama vinavyodhani kuwa rasimu hii imeyatupa mapendekezo yao na kuchukua mengine ambayo hayana masilahi kwao, na vipo vyama vinavyoyakubali na kuona kuwa mapendekezo ya rasimu hii yanalenga kutupa Tanzania mpya.

Pia wapo baadhi ya wabunge ambao katika maoni yao wameonyesha wasiwasi na baadhi ya mapendekezo yaliyomo ndani ya katiba hiyo, huku wengine wakisema yamezingatia masilahi ya nchi.

Viko vikundi vya watu hasa wanasiasa kwa mtazamo wao binafsi wameanza kutoa hoja za kupotosha kuhusu rasimu ya Katiba Mpya, wapo ambao wanadai kushangazwa na nchi kuwa na marais watatu kwamba haijawahi kutokea duniani.

Wengine tena viongozi wakuu wa vyama wamenukuliwa wakidai hawakubali rasimu ya Katiba Mpya kwa asilimia mia moja, wengine wanataka muungano wa mkataba wakati mwanzoni walikuwa wakidai serikali tatu, pia wakidai Zanzibar iwe na mamlaka kamili ikiwamo kiti katika Umoja wa Mataifa.

Tunachukua nafasi hii kuipongeza Tume ya Mabadiliko ya Katiba kwa kazi nzuri waliyoifanya ya kutoa rasimu inayotoa mwanga wa kuelekea kupata Katiba Mpya. Kama alivyosema Mwenyekiti Tume hiyo, Jaji Joseph Warioba kuwa hii ni rasimu tu ambayo itajadiliwa tena katika mabaraza na baadaye kwenye Bunge la Katiba.

Tunachukua nafasi hii kuwaomba wabunge na wanasiasa na watu wengine ambao wataingia katika kujadili rasimu hii katika mabaraza na bunge kutanguliza mbele uzalendo badala ya kutanguliza masilahi yao au ya vyama vyao.

Tunachukua nafasi hii kukiomba Chama Cha Mapinduzi (CCM), ambacho Kamati Kuu yake inakutana kesho kujadili rasimu ya Katiba kuhakikisha kuwa kinaweka masilahi ya taifa mbele.

Tunasema hivyo kwa sababu tayari kuna baadhi ya makada wa chama hicho wameanza kulalamikia rasimu hiyo wakieleza kuwa imeacha mapendekezo mengi yaliyotolewa wakati wa kukusanya maoni ya Katiba.
Source: http://www.mwananchi.co.tz

• Facebook
• Tweeter
• Google+
• Pinterest