Mchakato wa kampuni 100 bora waanza

Writen by sadataley 4:07 PM - 0 Comments

Ofisa Mwendeshaji Mkuu wa Mwananchi Communications Limited (MCL) Francis Nanai  na Mwenyekiti wa Bank M, Nimrod Mkono wakitia saini ya makubaliano ya benki hiyo kudhamini  utafiti kwa kuyatambua kampuni 100 bora ya kiwango cha kati nchini jana katika mchakato unaofanyika kwa ushirikiano wa kampuni ya MCL na KPMG. Picha na Venance Nestory 

Na Nuzulack Dausen, MwananchiDar es Salaam. Mchakato wa kutafuta kampuni 100 bora za kiwango cha kati nchini kwa mwaka huu, umeanza na kampuni mbalimbali zitafanyiwa utafiti kubaini viwango vyao vya ukuaji kibiashara.

Utafiti huo ambao hufanywa kwa ushirikiano wa Kampuni ya Mwananchi Communications Limited (MCL) kupitia gazeti la The Citizen pamoja na Kampuni ya Ukaguzi wa Hesabu ya KPMG, unalenga kubaini kampuni zinazokua haraka kwa kuonyesha ubora wa biashara na kuweka bayana  baadhi ya taarifa za mafanikio yao.

MCL inachapisha magazeti ya Mwananchi, Mwanaspoti na The Citizen.

Utafiti huo wa nne tangu kuanza kwake mwaka 2011 unazipanga kampuni kulingana na ubora katika nyanja za ukuaji wa mapato, faida, marejesho kwa wabia na uzalishaji wa fedha taslimu.

Akizungumza katika uzinduzi huo jana, mkurugenzi mtendaji wa KPMG, David Gachewa alisema kampuni bora katika utafiti huo ni zile zilizofanikiwa kukuza nafasi yake katika masoko na baada ya muda  maendeleo yanayosu marejesho kwa wabia na kuwa na hali nzuri kifedha.

Alisema utafiti wa mwaka huu utafanywa na taasisi ya Research Solutions Africa ambayo itahusika kupokea fomu za maswali wakati KPMG itapokea na kuzichambua taarifa za kifedha.

Pia, utafiti huo umepata mdhamini mpya ambaye ni Bank M ambayo itadhamini kwa miaka mitatu mfululizo hadi 2016 kwa Dola 100, 000 za Kimarekani (Sh165 milioni) kila mwaka.

“Kwa wanaoshiriki, utafiti huu unatoa fursa ya kushiriki kwenye maendeleo ya hifadhi ya taarifa za sekta na zaidi kujipima na wengine,” alisema.

“Wale watakaoingia kwenye orodha ya kampuni 100 bora watanufaika kwa kujulikana kuwa kampuni zilizofanya vizuri nchini na kisekta na kuingizwa katika klabu yenye hadhi ya waanzilishi wenye ustawi,” alisema Gachewa.

Aliongeza kuwa kampuni yoyote inaweza kushiriki kwa hiari isipokuwa benki, kampuni za bima, uhasibu, taasisi za ushauri wa kifedha na kampuni za sheria.

Mwenyekiti wa Bank M, Nimrod Mkono alisema benki yake itaendelea kusaidia jamii ili kuleta maendeleo nchini na kuongeza kuwa tayari benki hiyo ina miradi mbalimbali ya kijamii ambayo wao wanaiona ni sehemu ya utekelezaji wa nia njema.

Kwa upande wake, ofisa mwendeshaji wa MCL, Francis Nanai aliishukuru Bank M kwa udhaamini wake wa kuinua kampuni za kati na ndogo katika jitihada za kuleta maendeleo .nchini.

• Facebook
• Tweeter
• Google+
• Pinterest