Daftari la wapiga kura kuboreshwa

Writen by sadataley 4:15 PM - 0 Comments

Dar es Salaam. Serikali imesema itafanya maboresho ya Daftari la Kudumu la Wapiga Kura kwa awamu mbili kabla ya upigwaji wa kura ya maoni kupitisha Katiba Mpya.

Uamuzi huo wa Serikali unafanyika ikiwa imepita miaka mitano tangu Daftari hilo lilipoboreshwa mara ya mwisho Machi 2009, kabla ya kufanyika kwa uchanguzi Mkuu mwaka 2010.

Kwa mujibu wa sheria za uchaguzi, Tume ya Taifa ya Uchaguzi (NEC) inatakiwa kuboresha daftari hilo mara mbili kati ya uchaguzi mkuu mmoja na unaofuata, pia imebainisha kuwa itaboresha daftari hilo kwa mfumo wa Biometric.

Hayo yalisemwa jana na Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi wakati akiwasilisha rasimu ya mapendekezo ya bajeti ya ofisi yake kwa Kamati ya Katiba na Sheria.

Lukuvi alisema NEC imepanga kuboresha daftari hilo kwa awamu mbili kwa mfumo huo ili kuweza kuondoa changamoto zilizojitokeza katika mfumo wa awali wa Optical Mark Recognition(OMR).

Alisema awamu ya kwanza ya maboresho hayo, itaanza Septemba hadi Desemba, kwa tume kuandikisha watu wote upya, pamoja na watakaotimiza umri wa kupiga kura katika Uchaguzi Mkuu Oktoba mwakani.

Hatua hii itatekelezwa wakati  mchakato wa Katiba  ukiendelea kwa Bunge Maalumu la Katiba kujadili Rasimu hiyo kwa siku 60 kuanzia Agosti 5, kisha itafuatiwa na mchakato wa kura ya maoni ambao utawapa nafasi wananchi  walioingizwa katika daftari hilo kushiriki kuipigia kura.

Waziri Lukuvi alisema awamu ya pili inatarajiwa kufanyika kati ya  Aprili hadi Agosti mwakani, ambapo itahusisha wapigakura waliohama  toka sehemu moja kwenda nyingine, kuwaondoa wapigakura watakaokuwa wamefariki au kupoteza sifa na wapiga kura watakaokuwa wamepoteza kadi au kadi zao kuharibika.

Alisema, “Mpaka sasa serikali imetoa Sh39 bilioni kwa maandalizi mbalimbali ya uboreshaji kwa awamu ya kwanza kwa ajili ya kununua vifaa vya kuandikishia.”

Lukuvi alisema NEC inategemea kuanza vikao na wadau mbalimbali ambavyo vitajulisha jinsi mchakato huo wa uboreshaji awamu ya kwanza utakavyoendeshwa  na teknolojia itakayotumika. 

Kwa upande wake Mwenyekiti wa NEC, Jaji Mstaafu Damian Lubuva alisema lengo la tume hiyo ni kuhakikisha uboreshaji wa daftari hilo kwa awamu ya kwanza unakamilika ili watu wengi zaidi washiriki katika kura ya maoni.

Alisema wako katika hatua za mwisho za ununuzi wa vifaa mbalimbali vitakavyotumika katika uboreshaji huo ili kuhakikisha mchakato huo utakapoanza unakuwa katika hali ya ufanisi zaidi.

• Facebook
• Tweeter
• Google+
• Pinterest