Bajeti za wizara zinaandaliwa kisanii

Writen by sadataley 1:38 PM - 0 Comments

Waziri ya Nishati na Madini,Profesa Muhongo.PICHA|MAKTABA  

Tuliwahi kusema kupitia katika safu hii kwamba vituko vingi vinavyotokea hapa nchini ni vigumu kutokea katika nchi nyingine. Tulikuwa na maana kwamba nchi yetu ina matukio mengi ya ajabu na ya aina yake. Sote tunatambua kuwa iwapo matukio hayo yangetokea katika nchi nyingine, yangeonekana kama maajabu na kusababisha mitafaruku kiasi cha viongozi kuwajibika kwa kujiuzulu nyadhifa zao.

Habari kwamba uwasilishwaji bungeni wa Bajeti ya Wizara ya Maji na ya Nishati na Madini umesogezwa mbele kutokana na kasoro mbalimbali, zinathibitisha jinsi nchi yetu ilivyo ya ajabu. Muda wa mwaka mmoja wa kutengeneza bajeti ni mrefu. Hakuna ubishi kwamba muda huo siyo tu unatosha, bali pia ni mwingi mno kulinganisha na uzito wa kazi hiyo ulivyo. Serikali imesema bajeti hizo zimesogezwa mbele kwa sababu “hawajaweka bajeti zao vizuri”. Hayo ni maajabu ambayo hutokea Tanzania pekee.

Lakini kama Serikali inaweza kushindwa kutambua umuhimu wa bajeti kwa uchumi na maendeleo ya taifa, badala yake inatanguliza siasa na kusababisha uwasilishaji wa bajeti isiyokidhi vigezo, kwa maana ya bajeti iliyofanyiwa kazi kwa weledi na umakini, wananchi wanayo kila sababu ya kuhoji utendaji huo wa Serikali. Kwa upande mwingine, hali hiyo ilitarajiwa kwa kuwa mawaziri wote wa Serikali, ambao walitegemewa kusimamia sera zinazoongoza masuala ya utayarishaji wa bajeti za wizara zao walihamia Dodoma kwa siku 70 eti kushiriki katika Bunge Maalumu la Katiba. Hatuoni kama ilikuwa busara kwa mawaziri wote kuwa sehemu ya Bunge hilo na kupoteza muda katika kupiga siasa wakati masuala muhimu kama bajeti yakiwa yamewekwa kando.

Bajeti za wizara hizo sasa zitasomwa mwezi ujao. Wakati Wizara ya Maji ilikuwa iwasilishe bajeti yake jana, Bajeti ya Wizara ya Nishati na Madini ilipangwa kuwasilishwa Ijumaa ijayo. Sasa tunaambiwa kwamba Serikali imemwandikia Spika barua ikimwomba asogeze mbele uwasilishwaji wa bajeti hizo za Mwaka wa Fedha wa 2014/15. Sisi hatuoni uwezekano wa Spika kulikataa ombi hilo la Serikali. Hata hivyo, tunadhani lingekuwa jambo jema iwapo mamlaka husika zingewawajibisha viongozi wa wizara hizo kutokana na kutayarisha bajeti zisizotekelezeka.

Kutokana na kushindwa kusimamia wizara zake katika utayarishaji wa bajeti, Serikali imejiweka katika wakati mgumu. Baadhi ya mawaziri na watendaji wao wakuu wamekuwa wakidhalilika katika kuwasilisha bajeti zao kutokana na Kamati ya Bunge kuzikataa bajeti hizo. Wakati mwingine, Serikali imekuwa ikitoa visingizio kama ilivyofanya juzi kwa kusema kwamba wizara hizo hazitawasilisha bajeti bungeni kwa kuwa bado Serikali inafanya mazungumzo na Wizara ya Fedha, huku Waziri wa Fedha, Saada Mkuya akikanusha kuwapo kwa jambo hilo.

Zipo fununu kwamba Serikali inaogopa kuwasilishwa kwa bajeti hizo baada ya kubaini kwamba wabunge wengi wamekamia kuzikwamisha kutokana na miradi mingi iliyopangwa mwaka jana kutokamilika.

Tunadhani wabunge wana haki ya kuzikataa bajeti za wizara hizo kama hazitaendana na uhalisia kwa kuwa ndizo zilizopewa kipaumbele katika mpango wa Serikali wa Matokeo Makubwa Sasa (BRN). Wabunge kamwe wasikubali kuburutwa. Tunataka wakomalie bajeti ya wizara yoyote iliyotayarishwa kisanii, kiujanjaujanja na isiyokuwa na uhalisia.
Habari kwa hisani ya http://www.mwananchi.co.tz

• Facebook
• Tweeter
• Google+
• Pinterest