Writen by
sadataley
10:58 AM
-
0
Comments
Rais Kikwete
Na Frederick Katulanda
Sengerema. Polisi katika Mkoa wa Mwanza pamoja na maofisa Usalama wa Taifa wamezima jaribio la wakazi wapatao 10 wa Kijiji cha Kamanga ambao walikuwa na mabango kulalamikia kuporwa ardhi yao na baadhi ya viongozi wa Halmashauri ya Wilaya bila ya fidia.
Sakata hilo limetokea saa 5:30 asubuhi wakati Rais Jakaya Kikwete akiwa amewasili wilayani Sengerema kupitia njia ya maji baada ya kuvuka na Kivuko cha Kamanga huku wananchi hao wakijipanga kuonyesha mabango yao.
Hata hivyo watu ambao idadi yao ilikuwa yapata 10, wakiwa katika harakati za kutoka na mabango hayo walizingirwa na maofisa usalama na baadaye polisi na kuanza kupokonywa mabango yao.
Hatua hiyo ya kufika kwa maofisa polisi kuliwafanya baadhi yao wengine kutimka na mabango na hivyo kufanikiwa kudaka watatu wakiwa na mabango yao.
Baadhi ya mabango yaliyoonekana kuwa na maneno yanayolalamikia kuporwa ardhi zao bila ya kulipwa fidia, huku bango lingine likimtaka Rais Kikwete kusaidia tatizo la ardhi baina ya vigogo na wananchi.
Sakata la ardhi katika kijiji cha Kamanga linadaiwa kuibuka baada ya mmiliki wa Kivuko cha Kamanga kufariki na wajanja kujipenyeza kuandaa watu wanaoitwa wananchi kulalamika wakidai hawajalipwa fidia.
“Hapa kuna mgogoro wa muda mrefu, kuna kundi la watu waliibuka na kuzua madai ya kuporwa maeneo yao na mmiliki wa Kamanga, lakini baada ya kufuatilia tulichobaini ni kuwa walitumia nafasi ya kufariki kwa mmiliki wa kivuko kutaka kulipwa fidia, lakini tumewahi kuzikutanisha pande zote mbili, hawa wanaolalamika walilipwa wazazi wao fidia,” alieleza mmoja wa askari polisi ambaye hakupenda kutajwa jina lake gazetini.
Katika hatua nyingine, Rais Kikwete amemshukia ofisa mifugo wa wilaya ya Kwimba na kusema ni kikwazo cha maendeleo kutokana na kukwama kwa mpango wa uzalishaji ng’ombe kwa njia ya kisasa ya uhamilishaji mbegu (AI).
Akizungumza wakati wa kujadili taarifa ya maendeleo ya Wilaya ya Kwimba iliyosoma na Mkuu wa Wilaya, Selemani Mzee alisema njia ya kuzalisha ngombe wa kisasa kwa kupandisha na madume ambayo inatumiwa wilayani humo haiwezi kuleta mafanikio ya haraka na kusema tatizo ni ofisa mifugo, Eliakim Ole Wavia.
“Hebu kwanza…., mmesema mnazo ngo’mbe 390,000 sasa kama mnatumia njia ya kupandikiza mbegu ya kisasa kwa kutumia madume 12 kwa idadi hiyo ya ng’ombe lengo la kumaliza mifugo 390,000 silitakamilika miaka 100. Kwa nini hamtumii njia ya kupandisha mbegu,” alihoji Rais Kikwete.
Akitoa ufafanuzi Ofisa Mifugo wa Wilaya, Eliakim Ole Wavia alisema wamefikia uamuzi huo baada ya kupandisha mbegu 38 na kupata mimba tatu hivyo waliamua kutumia njia ya kupandisha madume na kwa kuanza walianza na madume 12, lakini katika mkakati mpya wamepanga kuongeza madume 32 kwa wastani wa dume moja kwa jike 32.
Hatua hii ilimshangaza Rais Kikwete na kumweleza ofisa mifugo kama kikwazo cha kufanikiwa kwa mpango wa uhamilishaji na kwamba ili mpango huo ufanikie naye anatakiwa kubadilishwa vinginevyo njia anayotumia italeta mafanikio katika kipindi cha miaka 100 wa idadi ya ng’ombe 390,000.“Wewe bwana mifugo unanishangaza sana, mbona mimi shambani kwangu ninapandikisha kwa njia ya mbegu na mafanikio ni mazuri sana. Sasa ilikuwaje nyinyi mbegu 38 mpate mimba tatu, basi wewe na mnaopandisha siyo watalaamu,” alieleza Rais Kikwete na kuanza kutoa somo la uhamilishaji akieleza anavyofanya yeye katika shamba lake Chalinze.
Alisema ukiwa na watalaamu wazuri kazi ya kwanza huwa ni kuchagua dume bora la mbegu na kisha kulidanganya ili kupata mbegu na kwamba mbegu zinapopatikana jike huchomwa sindano maalumu ambayo katika kipindi cha saa 72 hupevusha yai na ndipo mbegu hupandikizwa. Katika mpango huo uhakika ni asilimia 100 na hata ikikwama huwa ni mafanikio asilimia 80 kiasi ambacho ni kikubwa.
No comments
Post a Comment