Mkapa atoa hadhari kuhusu Katiba Mpya

Writen by sadataley 4:20 PM - 0 Comments

Rais mstaafu, Benjamin Mkapa akipokewa na Mkuu wa Mkoa wa Singida, Dk Parseko Kone kwenye viwanja vya zahanati ya Kijiji cha Senenemfuru, wilaya ya Singida kuzindua nyumba za watumishi zilizojengwa na Taasisi ya Benjamin Mkapa. Picha na Gasper Andrew 

Na Gasper Andrew, mwananchi

Singida. Rais mstaafu, Benjamin Mkapa amewataka Watanzania kuwa waangalifu ili mchakato wa Katiba Mpya usiwe sababu ya kupigana au kufarakana ili kupata Katiba itakayoendelea kudumisha amani, upendo, utulivu na ushirikiano.

Mkapa alitoa wito huo juzi, alipokuwa akizungumza kwenye hafla ya kukabidhi nyumba 30 za watumishi wa vituo vya huduma ya afya mkoani hapa zilizojengwa na Taasisi ya Mkapa HIV/AIDS Foundation kwa zaidi ya Sh1.9 bilioni.

“Vyovyote mchakato wa Katiba utakavyoishia, tuhakikishe tunabaki na amani na utulivu wetu kwa ajili ya ustawi wa nchi yetu, tuhitilafiane bila kupigana,” alisema.

Alisema Watanzania wanapaswa kwa pamoja wasiiharibu nchi yao na kuhakikisha kizazi cha sasa na kijacho, vinaendelea kuwaenzi waasisi wa Taifa kwa uadilifu mkubwa.

Akabidhi nyumba

Akikabidhi nyumba hizo, Mkapa alisema ana imani wananchi wanaohudumiwa na zahanati 15 zilizojengewa nyumba hizo wataendelea kufaidika na huduma bora kwa kuwa watumishi wameboreshewa mazingira ya kazi.

“Kama mnavyoona nyumba hizi ni za kisasa, zina maeneo muhimu yote yanayokidhi mahitaji ya binadamu, zipo imara na zimekidhi viwango vya ujenzi vinavyostahili,” alisema.

Aliitaka halmashauri zinazohusika kuhakikisha nyumba hizo zinatumika kama ilivyokusudiwa, kutunzwa vizuri na kutengewa bajeti ya kutosha kwa ajili ya ukarabati pale utakapohitajika ili ziweze kudumu kwa muda mrefu.

Vijiji vilivyonufaika vipo katika wilaya za Singida Vijijini, Iramba na Manyoni.

• Facebook
• Tweeter
• Google+
• Pinterest